Presidenti amerikan Donald Trump iu përgjigj për të parën herë publikisht akuzave për racizëm. “Unë nuk jam racist. Jam personi më pak racist që keni intervistuar ndonjëherë” – u shpreh Trump para gazetarëve, gjatë një deklarate në Florida.
Ditët e fundit presidenti amerikan është vënë përballë kritikave lidhur me fyerjet që u bëri emigrantëve afrikanë. Mediat raportuan se gjatë një mbledhjeje me senatorë, ai i kishte quajtur “nevojtore” vendet e Afrikës, Haitin dhe Salvadorin.
Ndërsa Presidenti Donald Trump i është rikthyer sërish qëndrimit të tij kundër lotarive që lejojnë hyrjen në SHBA të personave rastësorë.
“Si president, dua që njerëzit të cilët vijnë në vendin tonë të na ndihmojnë të bëhemi të fuqishëm e të mëdhenj dhe të vijnë përmes një sistemi të bazuar mbi meritën,” shkroi lideri i Shtëpisë së Bardhë, duke iu referuar programit të lotarisë Green Card, që i siguron fituesve kartën e rezidentit të përhershëm të Shteteve të Bashkuara.
Kreu i Shtëpisë së Bardhë edhe më herët është shprehur kundër lotarisë amerikane. Ai ka propozuar sistemin me pikë për tu bërë rezident i SHBA.
