Kryeministri Edi Rama ka vijuar fushatën elektorale, teksa sot takoi qytetarët e Pogradecit për zgjedhjet e 30 qershor, të cilat në fakt presidenti Meta vendosi t’i shtynte.
Megjithatë, Rama ka vijuar takimet, nga ku ka sulmuar ashpër krerët e opozitës, por edhe presidentin. Madje, si vijim të batutave me filxhanin, ai ka habitur qytetarët e Pogradecit teksa ka nxjerrë një filxhan dhe është tallur me opozitën dhe presidentin:
“Meqë këtu është zona e Bahri Falliut dhe doja t’jua tregoja me filxhan në dorë se çfarë i thotë fallxhorja Bahri Falliut. I thotë ‘Faro shoh një peshk të madh këtu në formë F-je edhe lek i madh Faro’, i thotë ‘lek i madh’. Edhe Faro i thotë ‘po kjo K-ja këtu afër, ç’a është kjo Korean?’. ‘Jo Faro’ i thotë ‘kjo K-ja këtu është Klevisi’ edhe i thotë ‘Po ç’a bën ky këtu po më ha lekët mua?’ Fallxhorja i thotë ‘Jooo. Ti ha Faro ti ha po shiko si hapet rruga e gjolit këtu dhe ja ku e ke dhe del një I që është Iliri dhe shiko Faro si e bën Iliri zjarr dhe gjithë gjoli bëhet tigan dhe K-ja bëhet ministër Drejtësie (qeshin të gjithë).
Tani në këtë situatë është mirë të qeshim dhe pak me këta, se këta ia ngrysën vetullat dhe ia ngrysën ballin këtij vendi, se këta janë për të qarë e për të qeshur. Meta thotë po shmang 97-ën, ca 97-e? E dini si shmanget 97-a, është e thjeshtë fare. Meta të ndalojë përdorimin e kafes turke në shtëpi deri më 30 qershor dhe u zgjidh!”
