Në pyetjen e bërë nga një ndjekës në rrjetet sociale, thuhej se shqiptarët punojnë skllavërisht për 300 mijë lekë të vjetra. Nga ana tjetër, gruaja e Lulzim Bashës, Aurela, udhëton në business class me këmbë përpjetë. Qytetari po kështu ironizonte edhe kryetaren e LSI-së, Monika Kryemadhin, duke u shprehur se vijnë nga Amerika në Shqipëri dhe mbushin çantat, edhe kjo me ‘këmbë përpjetë’.
Kësaj pyetje, Rama iu përgjigj se qeveria ka marrë vendimin që të mos udhëtojë me business class, me përjashtim të rasteve problematike.
“Dhe sa i përket biznes classit, qeveria jonë e ka marrë këtë vendim që ditën e parë. Nuk udhëton me biznes class, me përjashtim kur 198 centimetrat e mia udhëtojnë përtej oqeanit, për të mos dalë nga avioni i paketuar bashkë me shtyllën time kurrizore, që është bërë tani çështje publike”, tha Rama.
Gjatë prezantimit të Paketës Speciale Anti-KÇK, kryeministri Rama u është përgjigjur pyetjeve që i vinin në kohë reale nga ndjekësit e tij në Facebook.
