Mbrëmjen e djeshme, përballë analistëve Fatos Lubonja, Skënder Minxhozi dhe Arion Sulo, Grida Duma ka folur rreth librit të saj “Koha për politikë”. Ish-deputetja demokrate, teksa ishte e ftuar në emisionin “Real Story”, në News24, tha se në librin e saj flet për Reformën Zgjedhore.
Ajo u “ngacmua” nga analisti Skënder Minxhozi, se çfarë do të bënte ndryshe ajo, nëse do të ishte në krye të PD. Ajo trumbetoi me të madhe se flet për Reformën Zgjedhore, pasi PD s’do jetë kurrë në mbështetje të krimit të organizuar.
Pjesë nga debati:
Duma: Kam thënë për Reformën Zgjedhore se duhet të jetë e hapur. Këtu vijon ai grup pune që është ngritur, që për mua duhet të ishte ngritur më shpejt. Vota e lirë për mua ka vlerë kur ke alternativë. Unë kam thënë Reforma Zgjedhore, sepse PD nuk do të jetë kurrë me mbështetje të krimit të organizuar. Ne e kemi thënë që votat i blen krimi, dhe ne s’do t’i kemi kurrë këto vota.
Nëse jemi sot pjesë e një grupi parlamentar apo një parti, duhet të japim kontribut për atë parti. Ne duhet të jemi pararojë, duhet të jemi shumë më tepër gjithëpërfshirës dhe transparentë për Reformën Zgjedhore. Ekspertët në tryeza të hapura, akademikët, mund të jenë pjesë e një diskutimi shumë transparent, të asaj që PD ka mundësi ta bëjë.
Minxhozi: A ka problem lidershipi?
Duma: Padyshim që ka gjëra që s’kanë shkuar mirë. Këtë gjë e ka pranuar edhe vetë Basha.
Madje ka njerëz që e kanë kritikuar deri në ekstrem.
