Greqia ka vendosur të shtyjë deri në 31 dhjetor 2020, lejen e posaçme për punonjësit sezonal.
Sipas Top Channel, qarkorja e posaçme është dërguar pranë drejtorive të decentralizuara të emigracionit në prefektura në të cilën, urdhërohen drejtoritë e emigracionit, të pranojnë aplikime për punonjës sezonal, deri ne 31 dhjetor 2020.
Në qarkore theksohet se procedura nuk ndryshon. Pra, kushdo punëdhënës në sektorin bujqësor, dëshiron të punësojë një emigrant nga vendet e treta, mund të kryeje aplikimin pranë zyrave të decentralizuara të emigracionit në prefekturën e zonës që banon.
Gjithashtu, ai duhet të plotësojë një deklaratë përgjegjësie për punëdhënësin, me detyrimin e gjetjes se banesës, ta ketë të siguruar të paktën 20 ditë në 3 muajt e ardhshëm, të paguajë një taksë legalizimi 100 euro për punonjës, si dhe të sigurojë kushtet e jetesës për punonjësin sezonal.
Me këtë shtyrje, mundësohet hapja e tregut të punës për mijëra emigrantë shqiptarë të interesuar për punësim sezonal në Greqi. Që prej fillimit të kësaj procedure në maj të këtij viti, në sektorin e bujqësisë në Greqi janë punësuar me shumë se 30.000 emigrantë, shumica dërrmuese e tyre janë shtetas shqiptarë.
