Policia greke ka sekuestruar 407 kilogramë lëndë narkotike të llojit marijuanë, ndërsa në pranga kanë përfunduar dy persona, njëri nga Shqipëria dhe tjetri me nënshtetësi greke. Identiteti i të arrestuarve nuk bëhet i ditur, ndërsa policia vijon punën për zbardhjen e rrjetit të trafikantëve.
Sasia e lëndës narkotike është zbuluar me ndihmën e qenit antidrogë i quajtur “Rocky”. Sipas policisë greke, sasia e marijuanës po transportohej me dokumente false tregtare, dhe ishte fshehur në disa thasë të mbushur me oriz.
Lënda narkotike mësohet se kishte si destinacion shtetin e Holandës. Sipas mediave greke, kjo linjë ka trafikuar mbi 1 ton marijuanë në Holandë, Gjermani dhe Angli. Policia ka sekuestruar drogën me vlerë 4 mln euro, një pajisje përpunimi si dhe 10.000 euro.
Fillimi i vitit 2018, është shpallur nga Greqia si viti i luftës ndaj trafikut të drogës, ndërsa ditëve të fundit ka patur shumë të arrestuar, pasi janë pikasur persona të ndryshëm që trafikonin lëndë narkotike. TIRANA TODAY
