Greqia ka regjistruar një shifër rekord të rasteve të reja me koronavirus, gjatë 24 orëve të fundit.
Bëhet me dije se në vendin fqinj janë shënuar 262 raste të reja, shifra më e lartë kjo që prej shpërthimit të pandemisë.
Mediat greke raportojnë se 22 prej rasteve të sotme janë zbuluar në pikat e hyrjes të vendit si porte dhe aeroporte.
Deri më tani, Greqia ka regjistruar 6.177 raste në total me COVID-19. Numri i pacientëve në terapi intensive është trefishuar duke shkuar në 24 , prej të cilëve 3 janë nën 40 vjeç.
Gjatë 24 orëve të fundit janë shënuar 2 viktima, duke e çuar në 216 numrin e përgjithshëm të vdekjeve nga koronavirusi.
Duke parë rritjen dramatike të rasteve, ministri grek i Shëndetësisë iu ka bërë thirrje sidomos të rinjve të kenë kujdes duke zbatuar masat, pasi siç ka theksuar ai mosha mesatare e të prekurve me koronavirus në 11 ditët e para të gushtit është vetëm 36 vjeç.
