Pas vizitës në Kosovë, përfaqësuesi i presidentit amerikan, Richard Grenell ka udhëtuar drejt Beogradit.
Mediat serbe shkruajnë se ai pritet të zhvillojë një takim me presidentin Aleksandar Vuçiç. Pasi mbërriti në Beograd, Grenell u prononcua për gazetarët serbë duke thënë se ekziston një afat i shkurtër kohor, për zgjidhjen e raporteve mes Beogradit dhe Prishtinës.
Ai është shprehur se presidenti Trump nuk do që të shpenzojë kohë, teksa shton se ai nuk do të lejojë që zgjedhja të zgjasë shumë nëse nuk ka përparim. Grenell tregoi për gazetarët serbë edhe për kërkesat që ai i parashtroi Kosovës, duke theksuar se heqja e taksës ishte njëra prej tyre.
“Janë gjëra që edhe njerëzit nga fusha e biznesit e dinë se duhet të ndodhin, qytetarët e zakonshëm e dinë se duhet të ndodhë, por disa politikanë janë ‘robëruar’ në mënyrën e vjetër të të menduarit dhe dëshirojnë të grinden për gjithçka. Ekziston një hapësirë shumë e vogël dhe SHBA-të do të përqendrohen që ta zgjidhin, por do të insistoj që edhe Serbia të ndalet me lobimin e saj, një gjë e tillë duhet të ndodhë. Mendoj se jemi afër që të ndodhë një gjë e tillë. Njerëzit duan të ecin përpara, të shikojnë para dhe të tejkalojnë të kaluarën.
Po të parashikoja të ardhmen do të luaja loto dhe do të zgjidhja numrat fitues dhe do të isha një njeri shumë i pasur. Por, nuk di. Fakti që jemi përqendruar në këtë çështje, ndiej energjinë që mund të vijmë deri të zgjidhja, por më duhet të them se shumë pak kohë kemi për këtë, presidenti Trump nuk dëshiron të humb kohë dhe nuk do të lejoj që zgjedhja të zgjasë shumë nëse nuk ka përparim. Shpresoj që Serbia dhe Kosova ta shfrytëzojnë mundësinë që tani e kanë”, tha Grenell.