Në orët e vona të mbrëmjes të së dielës, një grabitje me armë ka ndodhur në autostradën Lushnje-Fier, më konkretisht në zonën e quajtur “Pushimi i Shoferit”.
Burimet paraprake bëjnë me dije se autorët kanë grabitur drejtuesin e një automjeti. Grabitësit i kanë dalë para makinës duke i bllokuar rrugën me automjetin e tyre, dhe nën kërcënimin e armës i kanë marrë telefonin shoferit.
Bazuar në kallëzimin e shoferit, autorët ishin të armatosur, njëri me kallashnikov e tjetri me pistoletë. Mjeti me të cilin grabitësit bllokuan rrugën ishte me targa angleze, dhe dyshohet të jetë i vjedhur.
Pas grabitjes autorët janë arratisur, ndërsa shoferi i mjetit që ra pre e kësaj grabitje ka bërë denoncim në polici. Uniformat blu kanë ngritur postblloqe për kapjen e tyre, por deri tani nuk ka asnjë shenjë prej tyre.
