Ndërron jetë në spitalin e Traumës Ragip Hajdini, një prej grabitësve të avionit me para në Rinas.
I njohur ndryshe si “Daja” nga Kosova, Hajdini kishte katër ditë që ishte shtruar në spitalin e Traumës. Mësohet se 50-vjeçari vuante nga një sëmundje e rëndë.
Familjarët e tij nuk janë lejuar nga bluzat e bardha për ta takuar, për shkak të situatës së koronavirusit.
Ragip Hajdini ishte personi i 6 i arrestuar si i dyshuar për grabitjen në Rinas i cili njihet edhe me nofkën “daja” ka qenë me precedentë të mëparshëm kriminalë.
50-vjeçari nga Peja e Kosovës i arrestuar në zonat përreth Kavajës për grabitjen në Rinas është i njohur për drejtësinë.
Arrestimi i tij erdhi pas dëshmisë së dëshmitarit të drejtësisë, Alkond Bengasi, që tha se “daja” nga Kosova ishte një person tullac, të cilin e kishte takuar disa herë me Admir Muratajn.
Ragip Hajdini rezulton me precedentë të ngjashëm penalë edhe në Kosovë, aty ku ka qenë i dyshuar për grabitjen e 25 kg ar nga Dhoma e Dëshmive në Policinë e Pejës, bashkë me 5 persona të tjerë.
Për grabitjen në Rinas, u arrestuan ndër të tjera Alkond Bengasi, Renaldo Sula, Oltian Veseli, Saimir Çela, Elton Pikli dhe Ragip Hajdini.
