Personi i gjashtë i arrestuar për grabitjen e milion eurove në aeroportin e Rinasit, Ragip Hajdini, i njohur ndryshe me nofkën “Daja”, nuk ka pranuar të bashkëpunojë me hetuesit.
Kosovari u arrestua ditën e premte, por gjatë ditëve që qëndron i mbyllur në izolim është pyetur disa herë nga grupi hetimor, por nuk ka dhënë asnjë sqarim, raporton ‘Tv Klan’.
Ndërkohë, 50-vjeçari pritet të dalë përballë trupit gjykues të hënën për t’u njohur me masën e sigurisë.
Bashkëpunëtori i drejtësisë, Alkond Bengasi ishte ai që u tha hetuesve se pjesë e grupit kriminal ishte edhe një shtetas nga Kosova që qëndronte në shoqërinë e Admir Muratajt, ndërsa hetuesit kanë dyshime se Hajdini ishte personi që ka siguruar makinën “Chevrolet”, e modifikuar më pas në Elbasan për t’u përdorur në grabitje.
Hajdini rezulton me precedent të mëparshëm penal pasi në vitin 2012 ka qenë i dyshuar për grabitjen e 25 kilogramë ar nga Dhoma e Dëshmive në Policinë e Pejës, bashkë me 5 persona të tjerë. Një tjetër grabitje për të cilin ai dyshohet se ka marrë pjesë është dhe ajo e një argjendari në Dibër të Madhe në Korrikun e 2014-ës. Ndërkohë të arrestuar për grabitjen e rreth 6.5 milionë Eurove janë Elton Pikli, Oltjon Veseli, Alkond Bengasi, Renaldo Sula dhe Saimir Çela. Sipas deklarimeve të 34-vjeçarit Bengasi, çdo gjë ka nisur para 6 muajsh në një drekë në zonën e Shkëmbit të Kavajës.
