Kreu i Shtetit, Ilir Meta, ka kujtuar sot 88-vjetorin e vdekjes së patriotit të madh Hasan Prishtina. Duke risjellë në kohë mesazhin e tij, Meta deklaron se sot kur ‘Shqipëria vuan plagën e madhe të shpopullimit, është detyra jonë t’i kthejmë rinisë shpresën’.
Postimi nga presidenti Meta
“Njeriu pa kombin është asgjë, e kombi pa brezat e ardhshëm shuhet”.
I vrarë pabesisht 88 vite më parë, kjo thënie e kolosit të politikës dhe çështjes shqiptare, patriotit të paharruar Hasan Prishtina, është më aktuale se kurrë.
Sot kur Shqipëria vuan plagën e madhe të shpopullimit është detyra jonë t’i kthejmë rinisë shpresën dhe besimin për ndërtimin e së ardhmes së sigurt europiane në Atdhe.
Kuvendi e shkarkoi me shumicë votash më 9 qershor kreun e shtetit. E njëjta mazhorancë që e votëbesoi për t’u ulur në karrigen e presidentit në 28 prill të 2017, katër vite më pas votoi për ta shkarkuar Ilir Metën për shkelje të rënda të Kushtetutës. Vendimi përfundimtar i mbetet Gjykatës Kushtetuese. Për socialistët, kreu i shtetit është përgjegjës për nxitjen e konfliktit me deklaratat e tij para dhe pas zgjedhjeve të 25 prillit.
Vendimi është depozituar për interpretim në Gjykatën Kushtetuese, por kjo e fundit duket se nuk e ka prioritet këtë çështje.
Vendimi për shkarkimin e Metës nuk do të merret nga Gjykata Kushtetuese, të paktën deri në fund të muajit tetor.
Vetë Gjykata Kushtetuese ka publikuar më herët kalendarin për çështjet që do të shqyrtojë në muajt në vijim, mes të cilave bie në sy mungesa e kërkesës së Kuvendit për shkarkimin e presidentit Ilir Meta.
