Nuk ka fitues në “Camp Nou”, kryendeshja e La Ligas mes Barcelonës dhe Real Madrid është mbyllur në barazim 2-2. Një ndeshje spektakolarë që i prodhoi të gjitha nga golat, tek Kartonët e tensioni. Katalanasit mbeten të pathyeshëm këtë sezon në kampionat , ndërsa Reali tashmë është me mendje në Kiev ku do të përballet me Liverpoolin.
Ndeshja fillon nën ritme shumë të larta, vetëm pas 10’ minutash është Luis Suarez që dërgon topin në rrjetë, pas një kundërsulmi fantastik me Sergio Roberto.
Gjithsesi, vetëm katër minuta më vonë, Cristiano Ronaldo barazoi për Real Madrid.
Ky ishte goli numër 400 për Real Madrid, në të gjitha ndeshjet “El Clasico”, në të gjitha veprimtaritë. I 18-i për Ronaldo në ndeshjet kundër Barcelonës, që në këtë mënyrë barazoi rekordin e Alfredo Di Stefano. Me asistin e dhënë Benzema është lojtari i vetëm i “Los Blancos” me dy shifrat për gola (11) dhe asiste (10) në këtë sezon.
Në minutat e fundit të pjesës së parë rritet tensioni në fushë dhe ka përplasje mes lojtarëve, fillimisht është, Ramos-Suarez që përdorin duart pas një stimulimi të uruguaianit.
Barcelona mbeti me dhjetë futbollistë, pas kartonit të kuq të marrë nga Roberto, i cili goditi me grusht Marcelo. Një lajm i keq erdhi edhe për Real, pasi Cristiano Ronaldo u dëmtua në pjesën e parë dhe nuk luajti në të dytën.
Barcelona pavarësisht se me një lojtarë më pak në fushë, në pjesën e dytë shfaqet shumë e rrezikshme dhe Lionel Messi gjen golin e avantazhit për katalanasit. Ishte Suarez që asistoi, por mënyra si rrodhi aksioni kishte një faull në dëm të Rafael Varane, por arbitri nuk e vlerëson si të tillë.
Ishte goli i 33-të i argjentinasit në La Liga, ku padyshim do të shpallet golashënuesi më i mirë. Goli numër 36 në 37 ndeshje kundër Real. Thjesht fantastik, i paarritshëm. Pas një ore lojë, Andres Iniesta u zëvendësua me Paulinho duke i dhënë fund “klasikes” numër 38 dhe të fundit në karrierën e tij. Keylor Navas bëri një pritje fantastike ndaj Messi, kur kishin mbetur 20 minuta lojë duke i mohuar golin e tretë ekipit “blaugrana”.
Në minutën e 72-të, Gareth Bale shënoi një gol fantastik duke vënë baraspeshën në “Camp Nou”. Uellsiani, krejtësisht në hije gjatë ndeshjes, shpërbleu besimin e Zidane në këtë situatë.
Faktikisht, Madridit iu mohua një penallti për faullin e Alba ndaj Marcelo, por në fund të fundit u krijua përshtypja se barazimi ishte rezultati më i drejtë…
