Dy të rinj shqiptarë të moshës 23 e 29-vjeç janë vënë në pranga, pasi në bashkëpunim me dy të rinj italianë, kanë goditur me thikë Nicola Bettarinin, djalin 19 vjeçar të prezantueses së njohur italiane, Simona Ventura dhe ish-futbollistit Stefano Bettarini.
Policia italiane e qytetit të Milanos ka vënë në pranga 4 persona, 2 shqiptarë e 2 italianë, të cilët një ditë më parë kanë qëlluar me thikë 19-vjeçarin, ndërsa mbi ta rëndon akuza e “tentativës për vrasje”.
Të arrestuarit shqiptarë janë të moshës 23 e 29-vjeç, ndërsa dy italianët 24 e 29-vjeç.
Ngjarja ka ndodhur rreth orës 5 të mëngjesit, në diskotekën Old Fanshion të Milanos, ku djali i Simona Venturës është qëlluar 11 herë me thikë, nga një grup personash. Ngjarja ka nisur pas një grindje mes grupit të miqve të tij, e disa të rinjve.
Mediat italiane raportojnë se 19-vjeçari Nicola Bettarini është jashtë rrezikut për jetën. Sipas rrëfimit të babait të tij, Stefano Bettarini, Nicola është qëlluar me thikë ndërsa tentonte të ndihmonte një mikun e tij. Po kështu një prononcim ka ardhur edhe nga e ëma e 19-vjeçarit. Ajo ka deklaruar për mediat “se falë Zotit, Nicola është jashtë rrezikut, e është një djalë kurajoz.”
“Në orën 5 të mëngjesit të së dielës mora një telefonatë që çdo nënë nuk do donte ta merrte”, është shprehur ajo, por falenderon Zotin që gjithçka shkoi mirë.
