Pas një sërë ndryshimesh në radhët e drejtuesve vendorë të policisë, Drejtori i Përgjithshëm i Policisë së Shtetit, Gledis Nano, ka vendosur që të testohen uniformat blu për përdorim të lëndëve narkotike. Përgjatë viteve, Policia e Shtetit është përballur me situata të pakëndshme të përfshirjes së efektivëve në aktivitete kriminale, duke vënë gjithë strukturën në fokus të akuzave publike.
Por tashmë, punonjësit e Policisë së Shtetit do të testohen në mënyrë periodike sa i takon konsumit të lëndëve narkotike. Deri më tani, ky lloj testi është bërë për punonjësit e policisë, vetëm kur kanë marrë emërimin për uniformën blu.
Testi ndaj policëve do të bëhet vazhdimisht, pasi pavarësisht se një efektiv policie mund të rezultojë negativ në test, vetë struktura mund të ketë informacione në vazhdim se ai është konsumues i lëndëve narkotike dhe ritestimi i tij do të bëhet në mënyrë krejt rastësore.
Ndërkohë, Drejtori i Përgjithshëm, Gledis Nano, ka firmosur urdhrin që është shpërndarë në 12 drejtoritë e qarqeve, përmes së cilit informon se punonjësit e policisë do të testohen për drogën.
Gledis Nano e konsideroi testin, si mundësi të vlefshme për rritjen e imazhit të Policisë së Shtetit në komunitet, dhe për fitimin e besimit të qytetarëve. Duke qëndruar në të njëjtën linjë, ai është shprehur se kryerja e testit periodik për përdorimin e lëndëve narkotike, do të eliminojnë akuzat e dashakeqësitë ndaj Policisë së Shtetit.
