Menjëherë pas vendimit për mosregjistrimin e zgjedhjeve në FSHF nga Gjykata e Tiranës, ka reaguar kandidati dhe rivali i Armando Dukës, Bashkim Fino.
Fino në reagimin e tij përshëndet vendimin e gjykatës, pasi sipas tij, parregullsitë në zgjedhje u denoncuan publikisht. Ai shkruan se drejtësia tregoi shpresën e ligjshmërisë, ndërsa veprimeve të paligjshme të Dukës nuk kanë për të gjetur sukses.
Reagimi i Bashkim Finos
Pasi konstatova dhe denoncova publikisht paligjshmërinë e funksionimit të FSHF, mënyrën se si i manipuluan zgjedhjet, duke futur persona të pautorizuar dhe shoqata te paregjistruara, bashkë me stafin tim, vendosëm të ndjekim rrugën ligjore. Kisha besim te drejtësia dhe ajo u shpreh sot, duke mos e regjistruar Asamblenë Zgjedhore të datës 7.02.2018.
Përshëndes shpresën që dha sot drejtësia, që çdo manipulim, nuk do ketë sukses para ligjit. Ky ishte një mesazh për të gjithë viktimat e këtij sistemi, që Armand Duka nuk kanë për të pasur më sukses me metoda të paligjshme. Procesi vazhdon edhe në KAS-in shqiptar dhe sidomos në Gjykatën e Arbitrazhit Sportiv në Lozanë. Për një futboll të pastër dhe të drejtë!”
