Gjykata e shkallës së parë në Durrës, ka vendosur që të mos pranojë mandatin e kryebashkiakes socialiste Valbona Sako, të dalë nga zgjedhjet e 30 qershorit.
Në vendim argumentohet se procesi zgjedhor i 30 qershorit nuk është i ligjshëm, pasi partia “Bindja Demokratike” është regjistruar jashtë afatit zyrtar, duke i bërë zgjedhjet nul.
Menjëherë pas kësaj ka ardhur edhe reagimi i kryedemokratit, Lulzim Basha duke e cilësuar vendimin e marrë nga gjykatësit si të drejtë, teksa shton se 30 qershori është një grusht kriminal, institucional i kryeministrit Rama.
“Farsa e 30 qershorit ishte masakër e Kushtetutës, e ligjit dhe e standarteve. Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak”, shkruan Basha në postimin e tij në Facebook.
Refuzimi i kandidates socialiste në Durrës, është i pari rast që ndodh në këtë proces te konfirmimit të kryebashkiakëve socialistë, që janë fitues në një proces pa garë, si ai i 30 qershorit.
Postimi i plotë i Bashës:
Farsa e 30 qershorit ishte masakër e Kushtetutës, e ligjit dhe e standarteve. Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak.
Farsa e 30 qershorit është një grusht kriminal institucional i Edi Ramës, përmes të cilit ai uzurpoi pushtetin vendor, por edhe KQZ-në dhe gjithë sistemin e administrimit të zgjedhjeve përfshi kolegjin zgjedhor. Të gjithë ata që u bënë pjesë e këtij grushti kriminal institucional, të gjithë ata që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale.
