Kryetari i Partisë Demokratike, Lulzim Basha ka reaguar, pasi Gjykata e Durrësit konfirmoi mandatin e kryetares së zgjedhur të Bashkisë, Valbona Sako, e cila doli fituese në zgjedhjet vendore të 30 qershorit.
Përmes një postimi në “Facebook”, Basha shkruan se drejtësia është nën kontrollin e kryeministrit Rama dhe është kthyer në private të tij.
“E gjithë drejtësia është nën kontrollin e plotë të Ramës. Vendimi i Gjykatës së Durrësit është vendimi i drejtësisë private që ka vendosur Edi Rama në Shqipëri.
Ky shpartallim i sistemit të drejtësisë do të prodhojë për një kohë të gjatë pasoja të rënda për vendin dhe qytetarët.
Nëse nuk e ndalim sa më parë Edi Ramën, Shqipëria do kthehet në një shtet tërësisht të falimentuar afrikan”, deklaroi Basha.
