Shkollat e Nju Jorkut duke filluar nga shtatori i këtij viti do të ofrojnë mësim në gjuhë të ndryshme, midis tyre edhe në gjuhën shqipe.
Gjuha shqipe është shtuar së fundmi në listën e gjuhëve të ndryshme.
Sipas studimit të Qendrës së Harvardit për Zhvillimin Ndërkombëtar, në shtetin e Nju Jorkut jetojnë rreth 60 mijë shqiptarë më shumë se në çdo shtet tjetër të Shteteve të Bashkuara të Amerikës.
Më shumë se gjysma e tyre jetojnë dhe punojnë në New York City, ndërsa enklavat më të mëdha ndodhen në lagjet e Bronksit të Pelham Parkway, Morris Park, Bedford Park dhe Belmont, shkruan New York Post.
Ndërkaq Morris Park do të jetë pikënisja e programit të parë mësimor shqip-anglisht. Këshilltari i Bronksit, Mark Gjonaj, i cili i përket brezit të gjeneratës së dytë, tha se është krenar që ka punuar në vendosjen e këtij programi.
Gjithashtu, në profilin e tij në Facebook shqiptari Mark Gjonaj theksoi se “Jam i lumtur dhe krenar që Programi i gjuhës shqipe do të bëhet realitet për herë të parë në Nju Jork të Shteteve të Bashkuara në shtatorin e 2018-s në P.S.105 në Bronks. Nju Jork Siti është vendi ku shkrihet diversiteti etnik dhe kulturor. Jam krenar si zyrtar i zgjedhur shqiptaro-amerikan, që kam punuar për këtë iniciativë. Përshëndes Ditën e Arsimit të NYC për përkushtimin e tyre për të mbështetur programin që reflekton diversitetin dhe strukturën e këtij qyteti të madh”, shkruan Gjonaj në profilin e tij në Facebook.
DOE do të hapë gjithashtu programe të reja mësimore në gjuhën arabe, bengale, kineze, frënge, italiane, koreane, polake, ruse, spanjolle dhe urduese.
TIRANA TODAY
