GJKKO ka rrëzuar kërkesën për zëvendësim mase kunddrejt ish-prokurorit të Vlorës, Maksim Sota. Maksim Sota mbetet në ‘arrest shtëpie’ megjithëse kërkoi zëvendësim të masës së sigurisë për arsye shëndetësore.
Në datën 4 korrik Gjykata Kundër Krimit dhe Korrupsionit të Organizuar (GJKKO) la të pandryshuar masën e sigurisë për 18 persona nga 28 të arrestuar gjithsej në kuadër të operacionit “Shpirti”. Për 14 prej tyre, GJKKO la në fuqi masën “arrest me burg”. Ndërkohë prokurori Maskim Sota dhe tre të arrestuar të tjerë Ilirjan Balla, Abdyl Krasniqi dhe Luan Krasniqi janë lënë në arrest shtëpie.
Maksim Sota u arrestua gjatë operacionit “Shpirti”. Ai e ka nisur punën në krye të Prokurorisë së Vlorës në vitin 2010, dhe ka qëndruar aty deri në vitin 2019.
Operacioni “Shpirti”
Operacioni antidrogë “Shpirti” i zhvilluar në 4 shtete, përfshirë dhe Shqipërinë, ka vënë në pranga disa zyrtarë. Në këtë operacion anti-drogë, është vënë në pranga prokurori i Vlorës, Maksim Sota.
Prokurori Maksim Sota ka drejtuar për disa vite Prokurorinë e Vlorës, ndërsa ka qenë dhe kandidat për të qenë pjesë e SPAK-ut. Sota, nuk ka mundur që të kalojë në fazën e parë të Vettingut. Ai ka nisur detyrën në krye të Prokurorisë së Vlorës në vitin 2010.
Sota ka qenë kandidat për në SPAK dhe në korrik 2019, u intervistua nga Këshilli i Lartë i Prokurorisë si kandidat i Strukturës së Posaçme Antikorrupsion, por u skualifikua që në fazën e parë. Gjatë intervistimit, Sota ka shprehur ambicien e tij për hetime të rëndësishme, dhe ka thënë para Këshillit se mban përgjegjësi të plotë për dosjet që ka hetuar.
“Kam kërkuar gjithmonë të hetoj dosje të vështira, dhe të përdor njohuritë e mia në ngritjen e akuzës. Kam mbajtur përgjegjësi maksimale për dosjet që kam pasur në hetim, dhe të cilat kanë përfunduar në Gjykatë me vendime të formës së prerë”, ka deklaruar Sota.
Mësohet se është arrestuar edhe Ilirjan Balla, ish-nëndrejtor i Vlorës, aktualisht shefi i sektorit kundër trafiqeve. Po ashtu është arrestuar Saimir Kurti, drejtor i zyrës së punës në Kavajë, si dhe Festim Lelaj, ish-oficer policie.
Kanë qenë dëshmitë e 4 bashkëpunëtorëve të drejtësisë, të cilët kanë dhënë më shumë informacione, duke ndihmuar autoritetet italiane dhe ato shqiptare në goditjen e këtij rrjeti kriminal.
Operacioni kundër trafikut të drogës, u zhvillua nga autoritetet italiane në bashkëpunim me ato shqiptare.
Ky operacion është vazhdim i hetimeve të operacioneve “Shefi” e “Kulmi” ekzekutuar në 2018 e 2020 nga Drejtoria e Anti-mafiaes italiane të Barit, ndërsa çoi në ekzekutimin e 38 urdhër arresteve për trafik ndërkombëtar droge, riciklim parash dhe korrupsion./Tirana Today
