Reshjet intensive në Gjirokastër kanë shkaktuar një rrëshqitje masive të dherave mbrëmjen e sotme në kodrën e Shtufi.
Një pallat 12-kate rrezikon që të shembet në lagjen “18 Shtatori” si pasojë e rrëshqitjes së dheut dhe masivit që ka bllokuar hyrjen. 25 familjet që banojnë në këtë pallat janë evakuuar të gjitha nga policia, pasi përpos lëvizjes së themeleve, balta dhe masivi i dheut ka arritur deri në katin e dytë.
Pallati është ndërtuar 10 vite më parë, ndërsa zona ka probleme me rrëshqitjen e dherave nga reshjet e dendura që kanë rënë në 24 orët e fundit në qarkun e Gjirokastrës.
Jo vetëm banorët e pallatit, por edhe banorët e tjerë dhe bizneset që ndodhen në këtë lagje janë në gatishmëri, pasi objekte të tjera mund të rrezikohen.
Probleme ka dhe me përrenjtë, ku përroi i Çullës dhë përroi i Gjokanës kanë dalë nga shtrati. Reshjet vijojnë të jenë intensive edhe gjatë orëve të mbrëmjes së sotme.
Ndërkohë prefekti i qarkut, tha se të gjitha institucionet janë në gatishmëri për t’iu përgjigjur çdo lloj situate që mund të shfaqet në orët në vijim.
Ndërkohë që sot ka pasur probleme në Gjirokastër edhe në Virua, rruga është bllokuar si pasojë e daljes së liqenit. Probleme ka edhe në disa fshatra në Zhulat dhe Luftinjë, që janë bllokuar dhe nuk kanë energji elektrike prej 48 orësh.
