Politikë

“Gjinia njerëzore”, gafa e radhës nga Gent Cakaj

               Publikuar në : 19:58 - 12/09/19 M. S

Ministri në Detyrë për Evropën dhe Punët e Jashtme, Gent Cakaj, ka qenë në një vizitë në Izrael dhe ka zhvilluar homazhe për të kujtuar viktimat e Holokaustit. Por teksa ka njoftuar qytetarët për zhvillimet e ditës, me anë të një postimi në Facebook, ai ka bërë gafën e radhës.

Faqja satirike Lolita shkruan: “Dikush t’i thotë të ngarkuarit me detyrën e drejtimit të Ministrisë së Jashtme, që të përqëndrohet tek lloji Homo Sapiens”.

Gafa e tij që po bën xhiron e rrjetit citon: “për të përkujtuar mizorinë më të tmerrshme të kryer ndaj gjinisë njerëzore”.  Me gjasë ai nuk e ka kuptuar kur ka shkruar: “gjinia njerëzore”.

Statusi i Gent Cakaj:

Gjatë qëndrimit në Izrael ishte detyrim moral vizita në muzeun e viktimave të Holokaustit për të përkujtuar mizorinë më të tmerrshme të kryer ndaj gjinisë njerëzore dhe orët më të liga të historisë botërore!

Pas tuneleve të errëta të Yad Vashem, përmes të cilave shpaloset pesha më e rëndë e kujtimeve të përvuajtshme përballë së keqës rrënjësore që mori trajtën e përpjekjes për shfarosjen e plotë të hebrenjve në përgjithësi, në fund shfaqet rrezja e bardhë e dritës mbi fushat e bekuara të Jurezalemit!

Ky përjetim duhet të shërben për të ndërmendur se fuqia e patjetërsueshme e kurajos njerëzore triumfon qoftë edhe mbi dhimbjet që nuk mund të përshkruhen e humbjet që nuk mund të zëvendësohen! Ajo kurorëzon shembullin e prekshëm se në fund përkushtimi ndaj mirësisë së përbotshme tejkalon edhe djallëzinë më të shëmtuar mbi faqen e tokës!

Përkujtimi i viktimave të Holokaustit duhet të shndërrohet menjëherë në angazhim kundër çdo trajte të antisemitizmit në veçanti dhe diskriminimit etnik apo fetar në përgjithësi!

Shqipëria është i vetmi vend në kontinentin evropian ku numri i hebrenjve gjatë Luftës së Dytë Botërore është shumëfishuar falë vlerave të shqiptarëve të zakonshëm që, duke hapur dyert e zemrave të tyre, u bënë mburojë shembullore kundër të keqës rrënjësore që la pas vetëm shfarosje e shkatërrim!

Përkujtimi i viktimave të Holokaustit, pra, gjithmonë duhet të nxisë një vetëreflektim të thellë historik dhe një vetëdijësim të madh moral jo vetëm kundër një historie që nuk duhet të përseritet por edhe për një botë solidare pa shtypje e përjashtim në baza etnike apo fetare!

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Kthehu
WhatsApp Denonco ne TT