Një infermier në Gjermani është dënuar me burg të përjetshëm për vrasjen e 85 pacientëve, të cilët ishin nën kujdesin e tij. 42-vjeçari Niels Hoegel kishte rrëfyer më parë për vrasjen e 100 pacientëve, ndërmjet moshës 34 dhe 96 vjeç, në dy spitale në Gjermaninë veriore ndërmjet viteve 2000-2005.
Por pavarësisht këtyre rrëfimeve ai u shpall i pafajshëm nga 15 akuza për shkak se nuk kishte prova të mjaftueshme.
Hoegel akuzohet se u ka dhënë pacientëve të tij ilaçe pa receta me arsyetimin ‘për t’i treguar kolegëve aftësitë e tij të ringjalljes dhe për të kaluar mërzinë’.
Policia dyshon se numri i pacientëve të vdekur mund të jetë edhe mbi 200, por nuk janë të sigurt për shkak se disa trupa janë djegur përpara se të bëheshin autopsitë.
Ish-infermieri po vuan tashmë dënimin e tij për 6 krime të kryera, duke përfshirë këtu një vrasje dhe një vrasje të mbetur në tentativë në vitet 2008 dhe 2015. Këto krime ishin shkaku që çuan në investigimin e qindra vdekjeve nga autoritetet dhe zhvarrimin e trupave të pacientëve, që kanë qenë shtruar në klinikën ku punonte 42-vjeçari.
Niels Hoegel u ka kërkuar falje familjarëve të viktimave të tij për aktet e tij monstruoze, duke u shprehur: “Sinqerisht, dua t’i kërkoj falje çdokujt për gjithçka kam bërë në gjithë këto vite”.
42-vjeçari, i cili është konsideruar si vrasësi serial me numrin e vrasjeve më të madh të kryera që nga koha e luftës, u dënua me burgim të përjetshëm nga Gjykata e Rrethit në Oldenburg.
