Kryetari i PD-së, Sali Berisha do të niset drejt Shkodrës, për të parë situatën e përmbytjeve atje për shkak të motit të keq.
“Për shkak të gjendjes emergjente në vend, kryetari i PD-së Sali Berisha niset për Shkodër”, thuhet në njoftimin e PD-së.
Për shkak të motit të keq është ndërprerë qarkullimi në aksin Shkodër- Tiranë tek Harku i Berdicës, për shkak të prezencës se ujit rreth 50 cm dhe për shkak të dëmtimit të urës së vjetër te Bahcallëkut, ku mbeturinat e saj janë përplasur në urën ekzistuese të Bahcallëkut.
Njoftimi i policisë ka konfirmuar edhe dy viktimat e para të motit të keq në Shqipëri, për këtë sezon dimri. Babë e bir u zhdukën mesditën e kaluar. Pjetër Rushaj, 50 vjeç po udhëtonte bashkë me djalin e vajzën me makinë në momentin që uji i përroit i mori përpara. Vajza arriti të dilte nga mjeti dhe u ndihmua nga një banor i zonës, ndërsa 50-vjeçari me djalin nuk ia dolën dot. Kërkimet nisën që dje, por u ndërprenë për shkak të errësirës e motit të keq, për të rinisur këtë mëngjes.
