Komisioni i Sigurisë ka pranuar kërkesën e kryeministrit Edi Rama për zgjatjen e gjendjes së Jashtëzakonshme të fatkeqësisë natyrore në qarqet Tiranë, Durrës dhe Kurbin deri më 31 mars 2020.
Kërkesa në fjalë do të kalojë në Parlament, nga ku pritet edhe vendimi përfundimtar. Së bashku me kërkesën, Kuvendit i është dërguar edhe një relacion shpjegues, shkresë që mban firmën e kreut të qeverisë dhe Sekretarit të Përgjithshëm të Kryeministrisë, Ëngjëll Agaçi
Në kërkesë cilësohet se: Lëkundjet e tërmetit ndonëse me frekuencë dhe intensitet më të ulët vazhdojnë të ndihen në qarqet e përmendura. Veprimtaria e strukturave operacionale dhe nevoja e marrjes se masave në kuadër të gjendjes së fatkeqësisë natyrore është emergjente, si në ditët e para të marrjes së masës.
Gjendja e Jashtëzakonshme në vend u shpall pas tërmetit tragjik të 26 nëntorit, i cili la pas 51 viktima.
