Të tjera prova janë gjetur në automjetin e braktisur nga autorët e atentatit tek mbikalimi i Shkozetit ndaj prokurorit Arjan Ndoja.
Në pjesë të makinës janë gjetur gjurmë gishtërinjsh, por edhe fije floku në njërën prej dy maskave që autorët kishin lënë brenda në mjet.
Këto prova konsiderohen nga grupi hetimor mjaft të vlefshme, pasi mund të çojnë në identifikimin e atentatorëve. Mirëpo, po hetohet edhe nëse bëhet fjalë për një rreng nga ana e autorëve, ku mund ti kenë lënë qëllimisht këto prova, për të shpërqendruar punën e grupit hetimor.
Prokuroria e Krimeve të Rënda po pret dhe ekspertizën e policisë shkencore për një rezultat final.
Mësohet se targa e makinës së përdorur nga autorët i është vjedhur makinës së një shtetaseje nga Tirana me inicialet V.Gj. Kjo e fundit kishte bërë edhe një denoncim 3 ditë para ngjarjes në Policinë e Tiranës, pasi kishte vënë re mungesën e targës.
