Bashkëpunëtori i ngushtë i presidentit Trump, Roger Stone është dënuar ditën e sotme me 40 muaj burg.
Politikani republikan i cili është përfshirë në hetimet për Rusinë në vitin 2016, akuzohet se ka gënjyer Kongresin si dhe ka manipuluar dëshmitarët. E gjitha kjo për të mbrojtur mikun e tij, presidentin e SHBA-së, Donald Trump.
Trump kritikoi javën e kaluar prokurorët shtetërorë, pasi kërkuan që politikani të dënohej nga shtatë deri në nëntë vjet burgim. Në postimet e tij në Twitter, Trump i konsideronte këto kërkesa si “të tmerrshme dhe të padrejta”. Pak më vonë, Prokurori i Përgjithshëm, William Barr rekomandoi dënim të ulët për Stone, duke nxitur reagime për ndërhyrje të mundshme presidenciale në këtë rast, që ka shtyrë 4 prokurorë të japin dorëheqje.
Barr pati thënë se nuk është ndikuar nga reagimet e presidentit. Mirëpo më shumë se 2,000 ish-pjesëtarë të Departamentit të Drejtësisë kanë nisur letër të hapur me kërkesë shkarkimin e tij.
Gjykimi kundër Stone rrjedh nga hetimi i Muellerit, i cili ka treguar në detaje për hakimin rus, përpjekjet për propagandë në zgjedhjet presidenciale të vitit 2016 dhe kontaktet në mes të fushatës së Trumpit dhe Moskës.
