Pas eliminimit të Juventus nga ‘Liga e Kampionëve’, në Itali kanë nisur të qarkullojnë emrat për zëvendësimin e trajnerit, Maurizio Sarri.
“Gazzetta dello Sport” ka sugjeruar emrin e Zinedine Zidane si zëvendësues të mundshëm për italianin, që më parë ka drejtuar Empolin, Napolin dhe Chelsea. Ndërkohë, një tjetër kandidat për stolin bardhezi përflitet të jetë edhe Simone Inzaghi.
“Ka qenë një sezon i hidhur. Të eliminohesh që në raundin e dytë në këtë mënyrë duhet të na bëjë të reflektojmë. Ne kemi një ekip të rëndësishëm dhe lojtarin më të mirë në botë. Do të duhen pak ditë për të marrë një vendim”, tha presidenti i Juventusit, Andrea Agnelli.
Nga ana e tij, Sarri ishte i qetë pas eliminimit: “Nuk pres që të ndodhë asgjë, unë kam një kontratë dhe do ta respektoj”.
Kujtojmë se Zidane ka drejtuar deri më tani vetëm Real Madridin si trajner.
