Drejtori i medias “Sky Tg24”, Giuseppe De Bellis ka kritikuar kryeministrin italian, Giuseppe Conte për sulmet e tij ndaj opozitës në këtë periudhë krize.
Në një analizë të publikuar në median e tij, De Bellis shprehet se populli italian priste nga Conte një fjalim për lehtësimin e masave shtrënguese, për marrëveshjen e Eurogrupit dhe më pas ti përgjigjej pyetjeve të tyre.
Por kjo gjë nuk ndodhi, teksa shton se ai doli me një fjalim që kishte për bazë një sulm frontal ndaj opozitës. Sipas De Bellis, ky reagim nuk erdhi prej ndonjë pyetje cinike apo ngacmuese, por prej impulsivitetit të vetë kryeministrit.
Drejtori i “Sky Tg24” tha se qeveria duhet të jetë më institucionale në sjelljen e saj, ndërsa sulmet ndaj opozitës ai i cilëson si gabimin më të madh të Conte-s.
Italia vijon të jetë shteti që ka regjistruar numrin më të madh të viktimave nga koronavirusi (18,849). Ndërsa renditet e treta për numrin më të madh të personave të infektuar nga COVID-19 me 147,577 raste, pas SHBA-ve (503,177) dhe Spanjës (161,852).
Mbi 1,7 milionë njerëz nga e gjithë bota janë prekur nga koronavirusi, ndërsa 103,847 persona kanë humbur jetën.
