Ankth dhe frikë tek ekipi i Bayer Leverkusen gjatë miqësores me Wuppertaler, pasi futbollisti i kombëtares gjermane, Karim Bellarabi është rrëzuar pa ndjenja para pankinës. Për rreth 30 minuta ai ishte pa ndjenja dhe u transportua me urgjencë në spitalin më të afërt. Por në seancën e radhës stërvitore ka qenë vetë futbollisti që ka sqaruar gjithçka, dukke theksuar se nuk ishte asgjë serioze, por kishte ndodhur nga temperaturat e larta dhe lodhja e tepërt.
“Ndjehesha pak i lodhur atë ditë. Por nuk kishte asnjë lloj shenje që mund të më linte të mendoja se mund të më ndodhte ndonjë gjë. U zëvendësova dhe pastaj u rrëzova para stolit. Nuk e dija se çfarë ndodhte për 20-30 minuta. Vetëm pasi kaloi pak kohë e kuptova. Fatmirësisht, ishte vetëm nga vapa”, tha lojtari për mediat në seancën stërvitore.
“Të gjithë u frikësuan shumë. Miqtë dhe familja imë sigurisht. Pasi ka raste që gjëra të tilla mund të shkojnë ndryshe. Prandaj jam i lumtur që kaloi pa probleme dhe jam kthyer me skuadrën”, tregoi ai.
