Fushata elektorale po tensionohet gjithmonë e më shumë, teksa pas krimit tëe rëndë në Elbasan, një tjetër ngjarje ka ndodhur në Poliçan, ku anëtari i LSI, Luan Tare ka rënë pre e dhunimit fizik.
Ai ka qenë duke hyrë në pallatin e tij kur është goditur me sende te forta në kokë e trup nga nipi dhe vëllai i kryetarit të Bashkisë Poliçan, Adriatik Zotkaj dhe 5 persona të tjerë, siç pretendon vetë i dhunuari.
Tare ndodhet në Qendrën Shëndetësore “Pellumb Dollani” në Poliçan, ku po merr mjekim. Lidhur me këtë ngjarje, ka reaguar edhe Presidenti i Republikës, Ilir Meta.
”Sapo fola me të plagosurin nga sulmi i pabesë i bandës rilindase të Bashkisë Poliçan, mikun tim të vjetër Luan Tare. Mësova se ishte sulmuar pabesisht nga banda, që dhunon popullin e Poliçanit, vetëm pse mbante në kokë kapelen me simbolet e partisë së tij.
I urova të shkuara dhe nesër do e çoj për kontroll më të specializuar në spitalet e Tiranës. I premtova se regjimit të dhunës edhe tre ditë dhe i vjen fundi përgjithmonë. Shqipëria nuk mposhtet nga dhuna e të pabesëve dhe horrave!”, shkruan Meta në rrjetin social, Facebook.
