E kush nuk e mban mend rastin e Zef Tuçit, kryefamiljarit të sëmurë me kancer, që jeton në Rrëshen në kushte të mjera. Vetë i pesti në familje, Zefi jetonte mes skamjes e sëmundjes, me vetëm 140 mijë lekë të vjetra në muaj.
Sot fondacioni “Fundjavë Ndryshe” së bashku me emisionin investigativ “Stop” kanë vendosur t’i bëjnë një surprizë të bukur Zefit në spital.
Gazetarja e emisionit sqaroi se Zef Tuçi është transferuar në Spitalin Onkologjik për një trajtim më të specializuar. Zefi vizitohet nga disa vullnetarë dhe është shumë i kënaqur me trajtimin në spital.
Koordinatori i “Fundjavë Ndryshe”, Shkëlzen Krajku tha se “Zefit i ka filluar rikonstruksioni i plotë i shtëpisë, kështu që jemi në rrugë të mbarë, ecuria e punimeve është shumë intensive. “Fundjavë Ndryshe” bashkë me shqiptarët dhe emisionin “Stop” kanë nisur shtëpinë tënde të re.”
Gjithashtu, Zefit i janë dhënë disa kontribute nga të gjithë shqiptarët brenda dhe jashtë vendit.
Zefi është shumë i gëzuar nga surpriza dhe bën një urim për të gjithë ata që e kanë ndihmuar, “Ju falenderoj shumë, ju a pruftë zoti mbarë dhe mos të sëmureni kurrë.”
