“Fundjavë Ndryshe” ka mundur të bëjë me shtëpi në gati një muaj tri familje në nevojë. Familja Biçaku, Zef Tuçi, dhe ajo e Çemerit tashmë do të kenë mbi kokë një çati.
Pasi ka konstatuar rastet e këtyre familjeve në nevojë, “Fundjavë Ndryshe” në bashkëpunim me bamirësit e kësaj nisme kanë nisur punën për t’u krijuar mjedisin më themelor për ta, atë të ndërtimit të një shtëpie.
Familja Çemeri
Një nga rastet më ekstreme ku “Fundjavë Ndryshe” ndërhyri në mënyrë urgjente ishte ajo e pak ditëve më parë në familjen e Zylfie Çemeri, e cila jetonte në kushte tejet primitive në Krutje të Lushnjës.
Pas transmetimit të kronikës në Top Channel, “Fundjavë Ndryshe” ndërhyri për të bërë të mundur nxjerrjen e kësaj familjeje prej kushteve të tmerrshme të jetesës, ku banesa më shumë i ngjante një guve shkëmbi sesa një shtëpie apo vendstrehimi nga temperaturat e ulëta.
Familja Çemeri veç varfërisë, vuajtjes së saj i shtoheshin edhe dy vajzat e sëmura.
Dy djemtë që jetonin dikur së bashku me to janë larguar. Njëri i shtruar në spital psikiatrik dhe tjetri nuk dihet se ku.
“Fundjavë Ndryshe” së bashku me vullnetarët e saj reagoi duke ndihmuar fillimisht këtë familje me ushqime.
“Fundjavë Ndryshe” e zhvendosi këtë familje në një ambient tjetër më të përshtatshëm, duke nisur paralelisht edhe ndërtimin e shtëpisë së tyre.
Zef Tuçi
Zef Tuçi është një nga rastet më domethënëse në evidentimin dhe ndihmën e dhënë nga “Fundjavë Ndryshe” ndaj familjeve në nevojë.
Përveç varfërisë Tuçi, vuante edhe nga kanceri. Rasti i Zef Tuçit u bë publik nga emisioni investigativ “Stop”.
Si fillim “Fundjavë Ndryshe” së bashku me emisionin investigativ “Stop” i erdhën në ndihmë kësaj familjeje me ushqime dhe orendi shtëpiake, si dhe një shume parash. Ndërsa “Fundjavë Ndryshe” ndërhyri menjëherë duke e zhvendosur nga banesa e tij e rrënuar në Rrëshen dhe duke dërguar për t’u kuruar në Spitalin Amerikan, ndërsa ka filluar puna për ndërtimin e shtëpisë.
Vetë i pesti në familje, Zef Tuçi jetonte mes skamjes e sëmundjes, me vetëm 140 mijë lekë të vjetra në muaj. Ndërsa tani do të mund të gëzojë banesën e ndërtuar nga “Fundjavë Ndryshe”.
Familja Biçaku
Në muajin nëntor të vitit të kaluar “Fundjavë Ndryshe” në bashkëpunim me emisionin “Opinion”, evidentoi në Thanasaj të Lushnjës një familje prej 7 anëtarësh e cila jetonte në kushte të vështira ekonomike.
Ndërsa vetë kryefamiljari Dritan Biçaku ishte i papunë për shkak të sëmundjes së tij. Pasi konstatoi një gjendje të tillë, “Fundjavë Ndryshe” arriti t’u ndërtonte banesën e pritur prej kohësh.
Në të tria rastet e përmendura më lart, “Fundjavë Ndryshe” ka arritur t’u sigurojë pjesën më bazike të tyre, atë të ndërtimit të shtëpive, duke mundur t’i kryejë në një muaj. Ndërsa vijon në trajtimin e rasteve të tjera të familjeve të evidentuara në kushte të vështira dhe ekstreme ekonomike.
