Ish-anëtari i Gjykatës së Lartë, Admir Thanza, po hetohet për fshehje pasurie. SPAK ka firmosur sekuestron për dy prona të tij, raporton “BalkanWeb”. Ish-anëtari i Gjykatës së Lartë po hetohet nga SPAK për “deklarim të rremë, e fshehje të pasurisë”. Në sekuestro është vendosur një garazh dhe një apartament 70 m2 në Tiranë, të dyshuara si të pajustifikuara në burime të ligjshme.
Gjatë Vettingut rezultoi se Thanza kishte fshehur një dënim me 40 ditë burg të marrë në Itali, për akuzën e “vjedhjes”, i konvertuar më pas në gjobë.
Problemet për Thanzën filluan gjatë hetimit të tij si gjyqtar për procesin e Vettingut. Veç problemeve të tjera që iu gjetën atij në seancën dëgjimore të zhvilluar më 10 korrik 2018 pranë Komisionit të Pavarur të Kualifikimit, Operacioni Ndërkombëtar i Monitorimit bëri të ditur se kishte zbuluar një dënim me 40 ditë burg për vjedhje në Itali në vitin 1999, të cilën nuk e kishte përfshirë në vetëdeklarim. Pas referimit nga KPK, prokuroria konstatoi se Thanza nuk e kishte pasqyruar këtë fakt në formular, dhe ngriti ndaj tij akuzën e falsififikimit të formularit dhe kërkoi dënimin me 1 vit e 6 muaj.
Në konkluzionet përfundimtare të prokurorisë sqarohet se Thanza nuk e kishte pranuar akuzën e ngritur, dhe se ka pretenduar se kishte dëshmi penaliteti të pastër. Prokurori sqaroi gjatë pretencës se në dëshminë e penalitetit të lëshuar nga Italia pas një letër-porosie është shënuar dënimi i Thanzës.
