Ipeshkvi i Dioqezës së Rrëshenit, Dom Gjergj Meta i ftuar këtë mbrëmje në studion e programit “A Shoë” ka folur për problemet sociale të zonës ku shërben.
Ai shprehet se është e frikshme që në këto zona të pasura nga natyra, njerëzit janë shumë të varfër.
“Zona që unë përfaqësoj është shumë e varfër, pavarësisht se pasuritë nëntokësore janë të mëdha. Ky është një paradoks i frikshëm. Para se të vija në këtë studio mora një mesazh nga një banor i Bulqizës, i cili më tha ta lexoj mesazhin: Ka 70 vjet që nxjerr krom Bulqiza thuaj dhe është vendi më i varfër në Shqipëri”,- tha ai.
Gjithashtu, Dom Gjergj Meta ka sjellë në vëmendje edhe shpopullimin e fshatrave.
“Varfëria e dytë përveç asaj materiale është ndjesia që ndjehen të braktisur. Është pak tragjike pasi ato zona janë të lëna pas dore, mungon infrastruktura, rrugët, fshatrat po braktisen nga njerëzit. Një fshat i bukur atje që deri para 9 vitesh kishte 100 nxënës sot ka vetëm 1 nxënës. Kur shkoj atje për meshë s’kam asnjë person të ri. Fshatrat e verilindjes po zbrazen”,- vijoi Dom Gjergj Meta.
