Forca të shtuara të policisë janë vënë re sot përgjatë “Rrugës së Kombit”, ndërsa ekzistonte mundësia për një protestë, e cila deri më tani nuk ka dhënë asnjë shenjë. Përflitej se banorët e Kukësit, bashkë me shoqërinë civile kishin planifikuar një protestë kundër këtij tarifimi, por situata deri më tani paraqitet e qetë.
Policia ka nisur masat që prej ditës së djeshme, ndërsa sot janë shtuar së tepërmi, edhe përgjatë “Rrugës së Kombit”.
Uniformat blu kanë zbarkuar në disa pika të aksit nacional, për të evituar incidentet. Deri tani, aplikimi i tarifës nuk është shoqëruar me asnjë problematikë.
Policia e Shtetit është vendosur në “Rrugën e Kombit”, në afërsi të sporteleve ku do të kryhet pagesa, për të siguruar që procesi i aplikimit të tarifës për ditën e parë do të kalojë pa probleme.
Në ndihmë të Policisë së Rendit kanë shkuar forcat e Ndërhyrjes së Shpejtë nga Tirana. 10 furgona të FNSH-së janë stacionuar në Kukës-Kalimash.
Zyrtarisht nuk është konfirmuar zhvillimi i një proteste, dhe në Policinë e Shtetit nuk është marrë leje, ndonëse prej ditësh, në rrjetet sociale është shpërndarë thirrja për organizimin e një proteste në “Rrugën e Kombit”.
https://tiranatoday.com/rruga-e-kombit-ankohet-shoferi-i-furgonit-me-moren-5-euro-jo-100-leke/
