Vendimi i Francës për të mos hapur hapur negociatat me Shqipërinë dhe Maqedoninë e Veriut mbështetet në dy boshte, të cilat janë respektimi i shtetit të së drejtës dhe lufta kundër krimit dhe korrupsionit, raportoi ABC News nga Brukseli.
Franca mbêshtet kështu qëndrimin e Gjermanisë për kushtëzimin për Shqipërinë, por është më e avancuar dhe më kritike lidhur me problemet e korrupsionit dhe krimit të organizuar dhe progresin e bërë në reforma.
Prandaj, Franca konsideron se hapja e negociatave të anëtarësimit duhet të shtyhet për në 2020 për të dyja vendet pasi të jenë përmbushur kushtet.
Ndërsa agjensia MIA, e cila citoi burime diplomatike franceze, raportoi se mbledhja e djeshme e ambasadorëve të vendeve-anëtare të BE-së nuk solli përparim në pozitën e Francës për fillim të negociatave me Maqedoninë e Veriut dhe Shqipërinë.
“Nuk presim të ketë ndryshime deri në vetë mbledhjen e ministrave të martën në Luksemburg, asgjë nuk ka ndryshuar në lidhje me javën e kaluar, vendimin duhet ta marrë presidenti Emanuel Makron,” thanë për MIA-n të pranishmit diplomatikë nw mbledhjen e djeshme tëambasadorëve.
Negociatat mes vendeve anëtare të BE-së gjithnjë e më shumë fokusohen në ndarjen e Shqipërisë dhe Maqedonisë së Veriut, veçanërisht pas qëndrimit të Qeverisë holandeze dhe kushteve të parashtruara nga ana e Gjermanisë.
