Situata nga koronavirusi në Francë është përkeqësuar në 24 orët e fundit, teksa është regjistruar thuajse dyfishi i numrit të viktimave që u shënuan dje.
Sipas mediave franceze, në 24 orët e fundit kanë humbur jetën 1,438 persona, ndryshe nga dje ku u regjistruan 762 viktima. Ky është bilanci i dytë më i lartë për sot, pas SHBA-ve të cilat regjistruan mbi 2 mijë viktima.
Kështu numri total i viktimave ka shkuar në 17,167. Ndërkohë në krahasim me ditën e djeshme ka pasur një ulje të numrit të rasteve të reja. Ditën e djeshme u regjistruan 6,524 raste ndërsa sot janë shënuar 4,560 raste të reja.
Lajmi i mirë është se ka rënë numri i pacientëve në spitale. Rreth 31 mijë persona janë shëruar nga koronavirusi në Francë, ndërsa 6,457 njerëz ndodhen në gjendje kritike për jetën.
Franca po i afrohet kështu edhe Spanjës e cila renditet e treta për numrin më të madh të vdekjeve (18,579), pas SHBA-ve (27,586) dhe Italisë (21,645).
Që nga shpërthim i koronavirusit, Franca ka regjistruar më shumë se 147 mijë raste infektimi, prej të cilave vetëm 99,741 janë ende aktive. Franca është vendi i katërt më i prekur në botë nga COVID-19.
Më shume se 2 milionë njerëz nga e gjithë bota janë prekur nga koronavirusi, ndërsa rreth 133 mijë persona kanë humbur jetën.
