Kreu i Këshillit Shkencor në Francë, Jean-Francois Defraissy është shprehur se edhe pse një valë e dytë e koronavirusit është e “mundur”, një karantinë e dytë e përgjithshme nuk do të ndodhë.
Në fjalën e tij përpara komisionit parlamentar hetimor mbi menaxhimin e pandemisë, eksperti tha se një rikthim i izolimit total do të ishte i pamundur, për arsye ekonomike dhe sociale.
“Duhet ti bëjmë vetes pyetjen sesi do t’ia shpjegojmë njerëzve që të rinjtë të cilët janë dhe më pak të rrezikuar mund të shkojnë në punë e të vazhdojnë shkollën.
Nga ana tjetër, personat për të cilët ky virus përbën një kërcënim, atyre po, duhet t`i këshillohet një izolim i pjesshëm”, tha ai.
Profesori Jean-Francois Defraissy është personi me të cilin konsultohet qeveria franceze, për vendimet që është duke marrë gjatë përballjes me krizën e COVID-19.
Kujtojmë se disa ditë më parë, presidenti Macron paralajmëroi për një kthim të mundshëm të virusit, duke thënë se “do të jemi gati të nisim një kapitull të ri në territorin tonë”.
Deri më tani Franca numëron 29,603 viktima nga koronavirusi dhe mbi 158 mijë të infektuar.
