Ministrat e Jashtëm të Bashkimit Evropian kanë rënë dakord të pezullojnë një marrëveshje për viza me Moskën, duke e bërë më të vështirë për qytetarët rusë hyrjen në bllok. Ukraina dhe disa shtete anëtare kishin bërë thirrje për një ndalim të plotë, por të tjerë si Franca dhe Gjermania ishin kundër.
Më shumë se një milion qytetarë rusë kanë udhëtuar në BE që nga pushtimi i Ukrainës në shkurt. Disa vende lindore të BE-së që kufizojnë Rusinë, pritet të vendosin kufizime të mëtejshme.
Zëvendësministri i Jashtëm rus Aleksandër Glushko tha se BE-ja “po qëllonte veten në këmbë” dhe masa nuk do të mbetet pa përgjigje. Ministri i Jashtëm ukrainas, Dmytro Kuleba e kritikoi vendimin si një “gjysmë masë”.
“Në lidhje me Rusinë [kjo] është pikërisht ajo që çoi në pushtimin në shkallë të gjerë të 24 shkurtit,” tha ai.
Shefi i politikës së jashtme të BE-së, Josep Borrell tha se rritja e konsiderueshme e pikave kufitare nga Rusia e bëri të nevojshme pezullimin e marrëveshjes.
“Ky është bërë një rrezik sigurie për këto shtete fqinje”, tha ai. “Përveç kësaj, ne kemi parë shumë rusë që udhëtonin për t’u çlodhur dhe për të bërë pazar sikur të mos kishte luftë në Ukrainë”.
Borrell tha se vendet në kufijtë e Rusisë ishin ende të lira, për të kufizuar aksesin për qytetarët rusë, madje edhe ata me viza.
Masa, e cila e bën më të gjatë dhe më të shtrenjtë për rusët marrjen e vizës, po shihet si një kompromis, me shtetet anëtare të paaftë për të rënë dakord për ndalimin e rusëve në tërësi.
Pesë vendet e BE-së në kufi me Rusinë, Finlanda, Estonia, Letonia, Lituania dhe Polonia thanë në një deklaratë të përbashkët se ata mund të vendosin ndalime ose kufizime të përkohshme “për të adresuar çështjet e afërta të sigurisë publike”.
Estonia synonte të ndalonte shumicën e rusëve që të hynin në vend brenda javësh, tha Ministri i Jashtëm Urmas Reinsalu i cituar nga Reuters.
Ministri i Jashtëm çek Jan Lipavsky tha se Komisioni Evropian do të shikojë mënyra për të shkuar më tej, duke shtuar se rreth 12 milionë viza u janë lëshuar rusëve – ekuivalenti i rreth 8% të popullsisë.
Por Franca dhe Gjermania paralajmëruan në një deklaratë të përbashkët se “kufizimet me shtrirje të gjerë” mund të ushqejnë narrativën e Rusisë si viktimë dhe të largojnë brezat e ardhshëm të rusëve.
Burimi i lajmit: BBC. Përshtatur nga Tirana Today
