Të jesh alpinist është një gjë sa e bukur, aq edhe e vështirë. Adrenalina që ndjen kur arrin majën e lartë të një mali, është mjaft e madhe, por duhet thënë se nuk mungojnë as rreziqet, e sidomos ato të papriturat që ndodh rrallë t’i parashikosh.
I tillë është rasti i katër të rinjve shqiptarë, që janë përballur me një ortek teksa ngjisnin majën e Ostrovicës, mbi 2000 metra mbi nivelin e detit.
Njëri prej alpinistëve, Isert Gjatolli, tregon për Tirana Today se si ai, së bashku me tre alpinistë të tjerë, i shpëtuan për mrekulli ortekut që i mori përpara, duke i hedhur tutje rreth 30 metra poshtë.
“Ishim 4 persona që po ngjisnim malin e Ostrovicës; unë, Marijon Pano, Eriseld Kalemaj dhe Ilda Bylykbashi. U lidhëm të katërt me litar dhe po ngjisnim malin kur përpara vjen një ortek, siç e shihni edhe në video. Unë isha i pari dhe tentova të hidhesha matanë, por më tërhoqën të tjerët. Na mori orteku deri në fund, por nuk na mbuloi”, rrëfen ai për Tirana Today.
I pyetur se ç’ndodhi më tej dhe nëse u lënduan, përgjigja e Isertit ishte:
“Ramë rreth 30 metra poshtë, por pamë që përgjithësisht ishim mirë, u lënduam pak. Filluam të kërkonim aparatin dhe GoPro-të, por nuk gjetëm gjë. I ngjitëm deri në majë dhe zbritëm përsëri. Unë shkova përsëri te vendi për të kërkuar, ku gjeta më pas aparatin dhe GoPro-të”.
Iserti e pranon që atë ditë ata ishin me fat dhe shpëtuan për mrekulli, ndërsa shton se pasioni që ka për alpinizmin e bën të mos heqë dorë asnjëherë.
Iserti duket se është i dashuruar me sportin ekstrem, teksa merret dhe me shumë sporte të tjera si Downhill me biçikleta, Motocross Snowboard etj. TIRANA TODAY
