Efthymiou Efthymious, 41 vjeç, lindur e banues Arta Greqi është personi që ekzekutoi mbrëmjen e së hënës Dëfrim Kasmin.
“Shtetasi grek është vetëdeklaruar si ish-punonjës i forcave speciale të policisë greke nga viti 1992 deri në vitin 2012, kohë në të cilën ai është përjashtuar nga kjo strukturë, sepse është konstatuar si trafikant i lëndëve narkotike”, deklaroi Ardi Veliu, drejtor i Policisë së Tiranës.
Ndërsa më tej policia bëri të ditur se kishte goditur një grup të organizuar ku organizator i tij është shtetasi i shpallur në kërkim (Altin) Aurel Hoxhallari.
Aurel Hoxhallari është një emër i njohur për policinë, pasi është arrestuar edhe më 10 Janar të vitit 2015 së bashku me kushëririn e tij Amarildo Hoxhallari, si porositës të dyshuar për atentatin ndaj Pajtim Serjanit, ngjarje e ndodhur më 5 Janar 2015 në “Rrugën e Kavajës” në Tiranë. Por, më 1 Shkurt 2015 Gjykata e Krimeve të Rënda i la ata të lirë për mungesë provash.
Ndërkohë shtetasi shqiptar Elton Halipaj i ka siguruar mjetet e nevojshme për kryerjen e krimit, shtetasit grek Efthymiou Efthymious. Nga të dhënat e para, shqiptari e kishte shok në Facebook, atentatorin grek.
Por, shtetasi Malvin Dinellari ka siguruar mjetet dhe përgatitur infrastrukturën për realizimin e vrasjes dhe Elton Hoxhallari dyshohet si bashkëpunëtor në sigurimin e mjeteve dhe përgatitjen e infrastrukturës për realizimin e vrasjes. Por këta dy emrat e fundit, akoma nuk janë bërë publike fotot. TIRANA TODAY
