Tatuazhet për futbollistët janë kthyer në mode, madje pjesa më e madhe e tyre e kanë trupin e mbuluar ato. Por duket se në Iran nuk ndajnë të njëjtin mendim, pasi dënohesh nëse shfaqesh në televizione publike pa i mbuluar ato. Futbollistit të kombëtares iraniane, Ashkan Dejagah mund ti kushtojnë shtrenjtë disa foto të postuara në ‘Instagram’ ku shfaqet pa i mbuluar tatuazhet.
Sulmuesi i cili aktivizohet me skuadrën e Traktor Sazit në Iran ka postuar në rrjete sociale foto duke treguar edhe tatuazhet e tij, gjë që në kulturën iraniane është e ndaluar. Më keq se kjo, postimi që mund të fundosë futbollistin, është urimi që i ka dedikuar gruas së tij dhe në foto e video, ajo shihet e pa mbuluar me veshjen karakteristike.
Sipas “Deutsche Welle”, Komisioni i Etikës pranë Federatës Iraniane të Futbollit ka nisur hetimin dhe pritet që të marrë masa për sulmuesin. Kujtojmë që edhe në Botëror, paraqitjet televizive ishin një çështje më vete, duke qenë se Puyol u la jashtë një emisioni sportiv, vetëm për faktin se kishte flokët e gjata.
