Një aksident i rëndë ka ndodhur para dy ditësh në autostradën Fi-Pi-Li në Montopoli të Italisë. Një automjet i drejtuar nga një 22-vjeçar shqiptar u përplas me një kamion.
Për pasojë, shqiptari i cili mbeti i plagosur rëndë ka ndërruar jetë në spital, ndërsa pasagjeri që ndodhej më të në mjet ka gjetur vdekjen e menjëhershme. Viktima është 22-vjeçari Klevis Luka, raportojnë mediat lokale. Mediat italiane shkruajnë se automjeti tip “Fiat Punto”, i drejtuar nga 22-vjeçari humbi kontrollin, dyshohet për shkak të lagështirës në rrugë, dhe u përplas në pjesën e prapme të kamionit.
Në një artikull ku pasqyron lajmin e ndarjen nga jeta të shqiptarit, “La Nazione” shkruan: “Ka humbur jetën pas një dite agonie drejtuesi i makinës që u përplas me një fugon në aksin Firence-Pisa Livorno.
Në aksident, humbi jetën edhe Oduware Imafidon, 21 vjeç, me origjinë nigeriane, i cili ishte në sedijen e pasagjerit.
Tani, sërish zi: Viktima është 22 vjeç, me origjinë shqiptare dhe ishte rezident në Livorno. Të dy lëviznin me një “Fiat Punto”. Në një pikë, drejtuesi dyshohet se ka humbur kontrollin dhe makina përplaset me një kamion të ndaluar anë rrugës. Afrikani vdiq në vend, ndërsa shqiptari u transportua në spital në Firence nga ekipet e emergjencës që u thirrën në vendngjarje pas përplasjes”.
Pas një ditë në agoni, Luka ndërroi jetë këtë të mërkurë në spitalin “Careggi“. Familjarët raportohet se kanë autorizuar autopsinë e viktimës, shkruan një tjetër media italiane./TIRANA TODAY/
