Protestuesit që u futën brenda selisë së PS-së në Shkodër, kanë djegur shumë dokumente dhe objekte që gjendeshin brenda këtij institucioni.
Si fillim, ata thyen xhamat dhe dyert e më pas karrikët e tavolinat duke shkatërruar çdo gjë. Ata kanë tentuar te ngjiten edhe në katin e dytë të ndërtesës, por kanë ndërhyrë forcat e FNSH-së.
Aktualisht në vendin e ngjarjes kanë mbërritur zjarrëfikësit, të cilët po shuajnë flakët që u vunë para selisë.
Prej 3 ditësh në Tiranë dhe qytete të ndryshme të vendit janë organizuar një sërë protestash për vrasjen e 25-vjeçarit, Klodian Rasha nga një efektiv policie.
Ministri i Brendshëm, Sandër Lleshaj njoftoi dorëheqjen nga posti 2 ditë më parë, por protestuesit nuk janë mjaftuar me kaq.
Ata kërkojnë edhe dorëheqjen e Drejtorit të Përgjithshëm të Policisë, Ardi Veliu, megjithatë kryeministri Edi Rama ka deklaruar se diçka e tillë nuk do të ndodhë, duke i etiketuar protestuesit, si lukubi halabakësh.
