Menjëherë pasi deputeti demokrat Edi Paloka hodhi bojë të zezë në fytyrën e kryeministrit Rama, kreu i Kuvendit Gramoz Ruçi urdhëroi që Paloka të dilte nga seanca.
Paloka ka refuzuar të dalë nga salla, ndërkohë që shërbimi i Gardës në Parlament i ka dalë përpara, për të mos lejuar një sulm të dytë mbi kryeministrin.
Ndërkohë që i pranishëm në Kuvend ishte dhe kreu i Kuvendit të Maqedonisë së Veriut, Talat Xhaferri, gjatë fjalës së tij kreu i PD-së Lulzim Basha sulmoi qeverinë e Ramës. Fjalimi i Bashës bëri që Rama të reagojë, nga ku ironizoi kreun e PD-së, duke e cilësuar si fëmijë që s’di çfarë thotë.
Deputeti i PD-së Edi Paloka u nxit nga fjala e kryeministrit Edi Rama, i cili u shpreh për Bashën: “I dashur miku ynë Talat Xhaferri, unë iu kërkoj ndjesë për shkeljen e kodit të mikëpritjes, po iu siguroj që fëmiu që sapo foli, nuk di se çfarë thotë”.
Palokës i është kërkuar nga kreu i Kuvendit Gramoz Ruçi të lerë sallën e Kuvendit dhe të dalë jashtë, por ky i fundit ka refuzuar. Në këtë mënyrë kreu i Kuvendit ka vendosur që të ndërpritet seanca.
