Një radhë e madhe njerëzish që kanë aplikuar për kredi të buta, janë mbledhur para Bashkisë së Tiranës.
Siç shihet edhe nga fotoja më poshtë, qytetarët nuk i respektojnë masat e distancimit të vendosura nga qeveria, në kuadër të situatës së pandemisë.
Ata janë ngjeshur me njëri-tjetrin në pritje të një përgjigjeje nga Bashkia, lidhur me kreditë e buta.
Në një kohë kur vendi po regjistron numra të lartë të infektuarish, ndërgjegjësimi i qytetarëve duhet të ishte më i madh. Ministria e Shëndetësisë njoftoi ditën e djeshme për 85 raste të reja dhe 4 viktima.
Manastirliu njoftoi dje për hyrjen në fuqi të aktit normativ për mbajtjen me detyrim të maskave, në ambientet publike. Kushdo që do të kapet në thyerje të kësaj mase, do të gjobitet në masën e 20 mijë lekëve të vjetra.
Lidhur me kreditë e buta, kryebashkiaku Erion Veliaj, njoftoi një muaj më parë se rreth 2 mijë aplikues e kishin kaluar fazën e parë të aplikimit. Kreditë e buta janë kredi të lehtësuara nga shteti, për banesa me kosto të ulët.
