Në “Murin e Kujtesës” ku janë të shënuar në formë simbolike me yje efektivët e policisë së rënë në krye të detyrës, e cila ndodhet te oborri i Ministrisë së Brendshme, është shkruar dhe emri i Klodian Rashës.
Emri i 25-vjeçarit është shkruar nga qytetarët, të cilët janë mbledhur pasditen e sotme për të protestuar kundër vrasjes së tij nga efektivi.
Qindra të rinj, djem, vajza e fëmijë janë mbledhur para Ministrisë dhe kërkojnë dorëheqjen e Ministrit të Brendshëm Sandër Lleshaj. Gjithçka ka nisur në orën 16:00 dhe prej orësh, të rinjtë vijojnë të ulërasin e të kërkojnë drejtësi për të riun që u vra, teksa një pjesë e tyre janë zhvendosur drejt kryeministrisë.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në Laprakë të kryeqytetit, pasi i riu kishte dalë orët e para të mëngjesit jashtë banesës së tij.
Policia shprehet se i riu ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
