Nxehen gjakrat tek protesta për të riun e vrarë nga Policia e Shtetit, Klodian Rasha. Disa prej protestuesve kanë thyer xhamat e dritareve të bodrumit të Ministrisë së Brendshme, duke u mbështetur nga të tjerët.
Policia po tenton t’i largojë nga godina, teksa raportohet për një efektiv dhe gazetar të lënduar nga hedhja e sendeve të forta.
Protestuesit dëgjohen teksa i bëjnë thirrje policisë: “Hiqini kapelet, nuk e meritoni atë Ministër. Keni kalamaj, hiqini kapelet!”
Të shumta kanë qenë reagimet ndaj kësaj ngjarjeje të rëndë, teksa kërkohet dorëheqja e Ministrit të Brendshëm, Sandër Lleshaj.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
Policia shprehet se Rasha ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por, ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
