Vrasja e Kostandinos Kacifas në Bularat të Gjirokastrës ka krijuar tension mes dy shteteve. Në Athinë anëtarë të Agimit të Artë kanë filluar protesta me thirrje raciste ndaj shqiptarëve ku kanë kërkuar edhe të fillojë lufta. Të martën në mbrëmje në protestën e organizuar para Parlamentit grek ata kanë djegur edhe flamurin shqiptar.
Të pranishmit njëzëri lëshojnë thirrje raciste dhe kërcënojnë për hakmarrje. Ndërsa në banderolat që mbajnë në duart shkruhet “Konstandinos Kacifas i pavdekshëm”.
Por duket se jo të gjithë grekët janë të prekur dhe të indinjuar nga vrasja e një ekstremisti grek i cili qëlloi në drejtim të policisë shqiptare. Në rrjetet sociale ata kanë filluar të tallen me neonazistët e Agimit të Artë. Ata kanë postuar një foto të njërit nga udhëheqësit e partisë, Konstantinos Barbarousis në krah të shqiptarit nga Lukova, Robert Hajdhi. Ironia e qytetarëve grekë ishte e tillë:
Luftë me Shqipërinë kërkon dhe Barbarousis. Bashkë me shqiptarin në skuadër: Robert Hajdhin.
Por kush është Robert Hajdhi:
Robert Hajdhi është bërë i njohur për aktivitetin e tij antishqiptar dhe bashkëpunimin me partinë neonaziste Agimi i Artë si dhe disa organizata për “vorio-Epirin”. Ai është një prej shumë personave me origjinë shqiptare që i janë bashkuar Agimit të Artë të cilët identifikohen me zhargonin “alvano-krisavgjites” (shqiptarët e Agimit të artë) dhe besohet se jeton aktualisht në Athinë, Greqi. Hajdhi është nga fshati bregdetar i Lukovës në jug të vendit. TIRANA TODAY
